قصة الهروب من الجحيم الى المجهول ''الجزء التاسع''

الجزء التاسع.........
خرجت من لاgار تلقيت دنيا أخرى و طاكسيات مستفين بزاف حتى عيطلي واحد قالي السلام وعليكم هو طاكسيور تركي و عرفني بلي حراق باين في وجهي متقشف هههههه طلعت معاه قتلو خاصني لوتال باش نبات هو يتكلم انجليزية
ملاحظة : اللغة الانجليزية مهمة جدا خاوتي خاصة في بلادات الناس تسلكك بزاااف
المهم قالي ما يكرولكش لأنه ما عندكش الأوراق و قتلو كيفاش دوك جاتني في راسي فكرة قتلو ديني coffee internet 24h داني لواحد ماشي بعيد بزاف فيه #سيبار و فيه لعبة #بيار billard ... و ما حبش يخلص مني ربي يكثر خيرو و يذكرو بخير .... دخلت للسيبار و شعلت السكايب و الفايسبوك و اليوتيوب هههههههه و خلصت هذاك قتلو حتى 07 تا الصباح تخلع هههههههه كان عندو كراسي هذوك الكونفور و نخبطها ب رقدا حتى للصباح ههههه جا نوضني على 07 قالي finich قتلو زيد ساعة عقلية تاع بلاد 😂😂
زادني ساعة رقدت منها وحد نصف ساعة و نضت دخلت غسلت وجهي عندو و قلت نروح للمحطة باش نكمل الطريق .
رحت شريت تيكي قالولي مكانش إلى #لويان ديراكت لانها دوار ف الجبل و معروفة ب الحراقة. .. كاين ل وحد الفيلاج قريب منها نسيتو وسمو. .... المهم ركبت و رحت حتى وصلت ل هاد الفيلاج و سقسيت مكان الطاكسيلت لي يدو ل هادي لويان حتى تلاقيتهم قالولي باسبور عندك؟ ؟ باين بلي حراق و عندهم قانون لي يدي معاه حراق ل هذي لويان يدخل للحبس على هذيك يخافو. ..
ما حبوش يدوني حتى حكمت واحد قتلو نعطيك 30 أورو و ديني قالي مشي مشكل اطلع و هو كان حاسب مكانش باراج في هذاك النهار 😂😂 حتى شافهم من بعيد من الخوف قالي اهرب اهرب ما تخلصنيش غير روح هههه المهم انا نزلت و كان الباراج بعيد المهم انا خليت الباراج على جنب من بعيد و حكمت الطريق حاكم بيها الميزان كي فت الباراج على اليمين بعدت مليح و رجعت للطريق و كملت حتى كما قالولي الجماعة ف اليونان على هذي لويان كاين مسجد و صومعة و كل سكانها من #ألبانيا مسلمين و الله كي شفت المسجد قلبي نزلت عليه السكينة و ارتحت و شعور لا يوصف "الحمد لله على نعمة الاسلام " مشيت بزاف حتى وصلت اول حاجة دخلت صليت ركعتين و طلبت الله يفرجها. ... خرجت و مشيت لوحد #السيبار مقابل للمسجد مش بعيد نتاع وحد ألباني حتى تلاقيت كامل الجزائر في هذاك السيبار 😂😂😂😂 ...... 
يتبع ...