الهروب من الجحيم الى المجهول ''الجزء 14''

الجزء ال14....
فتحولي الباب تاع السيارة تاع شرطة الحدود فورgونات كبيرة حتى تلاقيت بني عمك متساتفين كل واحد و منين جابوه من نقاط مختلفة و أول واحد حكيت معاه كان عنابي سموه #كحلة الله يذكرو بخير راهو حاليا في مرسيليا كاين داير قالبو بلي رجلو مكسورة 😂😂😂 و آخر من تيزي وزو قالي #يا_عجابا_كيفاش_حتى_شافونا ههههههه و آخرين من مدن مختلفة و كلهم جزائريين حوالي 13 واحد دارو بينا شوية كاش ما يزيدو يلقاو حراقة داخلين على الحدود ....
و بعد ساعتين داونا للكوميساريا في منطقة #ديبريسن و بعدها إلى الكامب و اعطاونا غرف و تيكيات للأكل و يخلصوك هههههه تبقى حاير و يلا راك مريض يداويوك .... جابولنا مترجم للغة الهنغارية هو جزائري عنده حوالي 50 سنة في عمرو من ولاية جيجل مع التحية لسكان جيجل و كان ينصحنا واش نقولو و عطاونا ورقة نمشو بيها صالحة لمدة 6 أشهر ... بقيت 4 أيام في ديبريسن و حملت نفسي و إلى العاصمة #بودابيست و بعدها إلى gyor منطقة حدودية مع دولة النمسا العظمى Autriche و دخلت إلى إلى العاصمة #فينا ليست بعيدة على الحدود الهنغارية و زدت رحت للكامب هههههه كيف كيف نفس العقلية مع هنغاريا غرفة و أكل و تخلص 😂😂😂 حاكمة خخخخخخ تروبوزي و تلاقيت مغاربة و جزائريين و تلاقيت صحفي جزائري جا ب الفيزا و طلب لجوء سياسي بات ليلة معنا و الصباح جاو داوه مش عارف وين .... خرجت من فينا إلى الحدود الإيطالية و دخلت إلى مدينة #برينيرو و بعدها بونزالو و إلى #تورينو و إلى مدينة #فانتيميليا الحدودية مع مدينة #نيس الفرنسية
اركبت ف القطار و خايف تلاقيت شيبانية قعدت نداسر فيها 😂😂😂 نهدر فيها ذراع علاخاطر ف الحدود الفرنسية يطلع البوليس و يطلب الأوراق ...طلعو ضربو طلة خفيفة و نزلو و دخلت إلى مدينة نيس الفرنسية .... أنزلت و روحت لوحد الطاكسيفون عندي صاحبي من شلف يعيش في مرسيليا اتصلت بيه ....
ألو أهلا كمال ....
كمال : الو شكون معاي
أمير معاك هههههه
كمال : مكانش منها راك هنا أ حواجة ههههه
ايه هذا وين دخلت و راني في نيس واش ندير ....
كمال : استناني دوك نجي نريكيبيري خويا روح عند la gare de Nice دوك نجي حوالي ساعتين نكون عندك نيس بعيدة وحد 200 كلم على مارساي
اوكي كمال راني نستنى خويا ...
فات ساعتين و ما جاش رجعت الو ا كمال وين راك
كمال : أصبر ا حواجة راني قريب أخ هههههه
المهم شوية و حبست Audi كحلة حداي جا هو و واحد أعز صديق وسمو #حمزة.... تقهوينا و إلى مرسيليا الله يكثر خيرهم و تحية لناس لصنام بالمناسبة ....
دخلنا حوالي 3 تاع الصباح ل مرسيليا كانت فارغة و ف الدخلة و سط المدينة لا أحد غير وحدة عربية تدور مع واحد كحلوش 😂😂😂😂.....
رحنا للدار و الصباح خرجنا حتى حسبت روحي رجعوني للبلاد اكسبيرسي 😂😂😂😂😂 مرسيليا نسخة للجزائر كوبي كولي
يتبع ....

الهروب من الجحيم الى المجهول ''الجزء 13''

الجزء 13....... 
قعدت 3 أيام في هذيك الدار و قالي موح أمير تساعفني غير كمل الطريق انا ما رانيش رايح انا حاب نستنى حتى ندخل على كرواتيا و انت علابالي راك باغي تدخل على #هنغاريا #المجر قتلو ايه .... قالي روح ل #سيبوتيسا و من تما ادخل راهي الطريق مفتوحة و غير تفوت الحدود تلقى الشرطة الهنغارية سلم نفسك ليهم و هوما يدوك. ... كي توصل إلى #سيبوتيسا أدي طاكسي للحدود و قطع على جهة اليسار تلقى شباك اطلع و أقفز و روح نيشان حتى تعبر الحدود و بالاك يمسكوك الشرطة الصربية راح ترجع حتى نقطة الصفر و يرجعوك حتى إلى #لويان مقدونيا .... المهم قعدنا مع بعض و الصبح اتكلت على ربي و مشيت لهذيك المنطقة ..... ديت طاكسي ب 20 أورو حتى الحدود و قطعت الطريق و قفزت فوق الشباك ماشي طويل حوالي متر و نصف و مشيت ف الظلمة ضواحي منتصف الليل و كاين غابة ماشي كثيفة خفيفة و مشيت و دخلت الحدود و تعمقت في #هنغاريا 😍😍 و كاين هذاك الوقت بزاف جزائريين يدخلو و لكن من نقاط مختلفة و كاين سيارات شرطة كبيرة فورgونات يدورو و يجمعو فيهم واحد واحد و يشوفوك ب لاجيمال الليلي أنفراروج انا رجعت نبحث على البوليس 😂😂😂😂
حتى والله بلا ما نعبى حتى حبس عندي والله ما تسمع الموتار ههههه Hi you have got passport هاي عندك باسبور هههههه قتلو أهلا بيك ههههههه
أهلا وسهلا بك لقد دخلت الاتحاد الأوروبي 😍😍😍😍😍
ربي كبييييييييييييييييييييييييييييييييييييير
يتبع ....

الهروب من الجحيم الى المجهول ''الجزء 12''

 الجزء 12.....

السيد الألباني غلق باب المحل و أبعث هذيك البنت الصربية قالها جيبي قهوة ب حليب و كرواسون الله يكثر خيرو ( دعوة الوالدين يلا ما ربحت تسلك على خير ) و قالي اقعد انا ما فهمت والو حتى قالي ( I'm Muslim ) هو مسلم و قالي استنى هنا ما تتحركش و أعطاني نظارات سوداء راني متذكرهم ليومنا هذا قالي ديرهم باش ما يعرفوكش بلي اجنبي ( ما تبانش كحل العينين هههه) و الحافلة تمر اونفاس ليه لاري. ... قالي مازال ما يجي الكار كي يبقى 5 دقايق أخرج و راك هنا ما تخافش و أعطاني دراهم تاع صربيا حق ثمن التذكرة الله يكثر خيرو و عمري ما ننسى هذيك اللحظة و أقسم بالله انا نكتب دوك و الحانوت تاعو بين عينيا. .... جا الكار و بقاني على خير و رحت ركبت و توكلت على ربي اتجاه العاصمة #بلغراد وصلت مع الليل للعاصمة ... رحت ل وحد السيبار اتصلت ب صاحبي لي كنت معاه في مقدونيا #لويان قتلو راني في #بلغراد اتخلع ههههه قالي الجماعة لي راحو معاك كامل رجعو قتلو علابالي الله غالب مكتوب المهم كفاش دوك. .. قالي روح لوحد البلدية وسمها #لوزنيسا بعيدة حوالي 200 كلم على بلغراد كي توصل سقسي على وحد المرأة نسيت إسمها تلقى العرب الحراقة قاعدين ف الكامب سقسيهم عليها روح عندها و قولها فلان رسلني هي تكري في دارها بيت تكري 5 أورو لليلة .... المهم في هذاك الوقت ما تلاقيتش الركبة. ... بايت ف المحطة حتى الصباح و البرد يقلي حتى 6 تاع الصباح شريت تيكي و مشيت وصلت إلى #لوزنيسا تلاقيت واحد تونسي سقسيتو عليها ورالي دارها و غير دخلت تلاقيت #موح_الرغاية هو فتحلي الباب .... موح هذاك لي دالو آمين خو ساعد القط دراهمو ... هو خرج معاي في نفس الليلة و لكن من طريق آخر و كان يتسنى فيهم طاكسي حراق وصلهم ديراكت ل هاد الدار ..... المهم

مكانش منها واش راك دير هنا موح هههههه 

موح : انا خرجت ف الليلة لي خرجت انت فيها بصح جيت ديراكت في طوموبيل و انت كفاش ... 

انا : أودي غير اسكت انا خرجت مع 18 واحد طاحو الدولة هربو و انا تخبيت و بايت في كوري طولت و راحت الطوموبيل عليا لي كانوا يستناو فينا .... 

موح : المهم علا سلامتك أمير الحمد لله لي وصلت بخير ادخل اضرب دوش و ريح شوية ولا ارقد راك تبان نعسان 

انا : حلبني موح هاد الدار كفاش هههه

موح : أودي هذي صربية متزوجة مع واحد تاوعنا دزيري 😂😂😂😂 الجزائري وين يروح يدير العش خخخخخخخ 

يتبع .....

الهروب من الجحيم الى المجهول ''الجزء 11''

الجزء ال11.......
بعدما طاردتنا الشرطة الصربية و انفصلت على المجموعة لي كان فيها 18 شخص و هربوا رجعوا إلى #لويان تلقيت هذاك الطفل ممكن عمرو بين 14 أو 15 سنة في بيسكلات vélo كان يهدر معاي بالإشارة قالي تبعني داني ل وحد البيت مهجور في وسط هذاك الدوار و قالي ادخل هنا تخبا ... كان عندي ساكودو فيه الماء و سربيتة و ماكلة. .. ادخلت لقيت فيه الحمام هذاك السكن و الريحة حاشاكم تقتل ب الزق حاشاكم ... فرشت السربيتة و تكسلت بصح الريحة ما خلاتنيش نرقد بايت قاعد نستنى ف الحال يبان. .. طلع الصبح خرجت و تبعت الطريق قبالا قبالا ... شفت زوج بوليس يتقهواو بصح كي تكون وحدك ما يدوهاش فيك و مشيت مشيت حتى نتفخت كثر من نكاز 😂😂 وصلت لبلدية كبيرة شوية مليحة كانت حوالي 10 تاع الصباح اول حاجة تلاقيت محل ملابس عاد كي فتح فيه بنت تخدم صربية و ما تعرفش تهدر انجليزية. .. هي كي شافتني في هذيك الحالة و ريحة الحمام فيا توسوست مني .. انا كي شفتها توسوست خفت تعيط للشرطة اجبدت الدراهم من جيبي كنت خادم مليح في لويان 😉😉 كي شافت الدراهم ابتسمت ابتسامة عريضة 😂😂😂😂 شريت سروال و حذاء و تريكو و فيستا و شواتني ف السومة 😂 اتكلمت معها ب الإشارة وين الدوش قاتلي لهيه ماشي بعيد عليها ... ادخلت و ضربت دوش و خرجت نبحث على محطة الحافلات باش نجيبها في العاصمة #بلغراد دخلت لمحل نسقسي و تماك هذاك الوقت ما ننساهش طول حياتي ..... لقيت راجل و بنت في هذاك المحل تاع كوسميتيك. .. سقسيت السيد ب الإنجليزية انا ابحث عن محطة الحافلات أريد الذهاب إلى العاصمة بلغراد ... مباشرة قالي where are you from ( من أي بلد انت ) خفت يلا يعيط للشرطة قتلو Palestine و غير سمع كلمة فلسطين أقسم بالله راح يجري غلق باب المحل ( السيد ألباني مسلم ) ....
يتبع........

الهروب من الجحيم الى المجهول ''الجزء العاشر''

 الجزء العاشر........المهم تلاقيت بزاف جزائريين بزاف في #لويان و مغاربة و كاين ناس تخدم تحرق منهم #أمين و هو أخو #ساعد_القط الممثل ... صراحة خاوتي ماشي راجل كي وصلت سمعت الناس كامل دايلهم دراهمهم و هارب و يخليهم و كي يسمع بلي الجماعة لي سرقهم راحو كملو الطريق يرجع ل هذي لويان باش ينصب على جماعة جديدة يقولهم عندي صحابي ألبان يدوك للنمسا ب 1000 أورو و ناس مساكن تعطيه الدراهم و خاصة تاوعنا يديرو فيه الثقة منينو جزايري و ف التاليا عراهم مساكن ربي وكيلو. ...
تلقيت مع واحد أفغاني يخدم حراق قالي تخدم معاي قالي انت تتكلم غربية و انجليزي و جيبلي العرب نديهم و انت تخدم معاي guide توصلهم داخل صربيا و انا نعلمك الطريق ... قتلو ايه مشات و عطاني دار وين نبات تماك ( دعاوي الخير و دعوة الوالدة و الوالد تطيح ف النار و ما تتحرقش ) بديت كل يوم نروح معاه حتى حفظت النقطة 😉😉 و أصبح أمير حراق 😂😂 .... رجعت ف الاسبوع ندي رحلتين أو ثلاث رحلات تضم كل رحلة من 8 إلى 12 شخص على حسب و ندي 50 أورو للواحد من عند الأفغاني لأن الريسك وأعر لوكان يحكموك البوليس راك ف الحبس لأنك انت guide .....
خدمت و اتصل بي عبر السكايب صديقي مغربي أمازيغي كان معاي ف الترك و ف اليونان و قالي أرواح نشربو قهوة في أمونيا حسبني راني ف اليونان 😂😂😂 قتلو صباح الخير راني في حدود صربيا 😲😲 قالي راني حاصل شريت جواز مضروب ب 1000 أورو و ما قدرتش نخرج من المطار ... وريتلو الطريق كاملة حتى لعندي. ... و زاد تلاقيت واحد حبيبنا من الرغاية أسمو #موح_الرغاية دايلو آمين خو ساعد القط دراهمو و كان يتسنى فيه يبان معول يقتلو. ...
المهم نختصر عليكم قعدت قريب شهر هكداك حتى رفدت روحي من الناحية المادية و زاد لحق صاحبي المغربي. ....
قلت للأفغاني أسمو #جوني و هو مسلم انا راني مسهل يلا كتب ربي و كانت 18 شخص دايهم معاي نوصلهم للنقطة في صربيا باش نتلاقو مع السيارات لي مداري نخدمو معهم يوصلونا للعاصمة #بلغراد و خرجنا ف الليل و كي عبرنا الحدود على نفس الطريق عادي و لكن كي دخلنا للفيلاج و رايحين عند مكان الموعد حتى خرجولنا البوليس و الجميع لازم يرجع ل مقدونيا و انا انفصلت عليهم و هوما جراو وراهم و تلاقيت وحد الطفل عمرو حوالي 15 سنة قعد يتكلم معاي ب الإشارة ( أرواح اهرب من هنا و قالي تبعني) داني لوحد البيت مهجور في وسط هذاك الفيلاج. ..... 
يتبع ....