الهروب من الجحيم الى المجهول ''الجزء 17''

بعدما كنت هذيك العايلة الألمانية و بقيت مدة و بديت نتعافى من يدي المكسورة قررت نروح للكامب ب #كيمنتس شرق ألمانيا... قتلهم I want to go now under thank you very much for all حاب نروح و صحيتو على كلشي 
بقيتهم على خير يكثر خيرهم و وصلوني للمحطة ... ركبت ف القطار بعيد حوالي ساعة على المدينة ... وصلت ل كيمنتس و لكن ما نعرفش المكان بقيت في المحطة مدة طويلة حتى يبان كاش عربي ... حوالي 2 ساعتين حتى جازو زوج توانسة سألتهم 
السلام عليكم خو ... و عليكم السلام و رحمة الله و بركاته 
يا خو الكامب وين جاي ؟
أرواح معنا حتى حنا رانا رايحين حنا ساكنين تما 
ايا قلت الحمد لله مزية 
ترافقنا للكامب بعيد حوالي 20 دقيقة على الأقدام... وصلنا هوما دخلوا و انا بقيت عند الباب ما عنديش بطاقة الدخول 
قالي الأمن نتاع الباب انت جديد ؟ بالإنجليزية 
قتلو yes 
قالي اصبر و نادى وحد السيد فلسطيني مترجم يسموه احمد 
جاء و قالي السلام عليكم ... و عليكم السلام 
أرواح معاي للإدارة..
رحت معاه و قالي من أي بلد انت ؟؟ 
قلتلو انا من الجزائر... قالي اسمك .. اعطيتو البيانات غالطة 
المهم اعطاوني بطاقة و قالولي تبقى هنا و يامات و نديرولك transfer لمدينة أخرى انت و زهرك.... قالي تصبر حتى يأتي دورك باش نأخذ الهوية و البصمات وووووووو 
المهم تلاقيت 2 وهارنة تماك و واحد من بوفاريك و واحد من تيارت و واحد من العاصمة و واحد سطايفي و الآخرين كلهم شيشان و توانسة ... 
اعطاوني غرفة مع واحد من ( وجدة ) يسموه محمد ناس ملاح و ولد فاميليا و كان معنا آخر تونسي و في هذاك الوقت كان دخل رمضان و خونا المغربي كان مؤذن في الكامب في رمضان .... قسما بالله غير التوانسة واحد ما يصوم لي كانوا في الكامب و العياذ بالله .... كانوا يعطونا وجبات حلال للمسلمين قبل وقت الإفطار.... بقينا حتى فات رمضان عطاوني موعد بعد اسبوع من اجل البصمات ... و جاء موعد transfer و بداو يرسلو بالمجموعة و رسلو خونا المغربي المؤذن إلى مدينة #درسدن و عطاولو بيت تماك و بقيت معاه على اتصال ... قالي أمير في اي وقت تحب تجي خويا مرحبا بك .... قبل يومين من الموعد تاعي قلت نشوف يلا نبصم في ألمانيا و لا نزيد نشوف ... اتصلت به محمد المغربي 
الو وي خو ... باينتلي ما نبصمش دوك 
محمد : يا أمير كيما تبغي و يلا ما راكش حاب تبصم في لالمان و أرواح الدار دارك ... 
حكمت القطار و جبتها في #درسدن .... الصورة من الكامب 
يتبع ...

الهروب من الجحيم الى المجهول ''الجزء 16''

  

قالي يلا راك معول تروح روح ل #درسدن شرق ألمانيا حدود #تشيكزلوفاكيا رماني على راسي و هذيك البلاصة معروفة ب النازية .... المهم انا هذاك واش حفظت في راسي #درسدن قالي كاين فيلاج بعيدة ساعة عليها وسمو #كمنيتس تماك مركز اللجوء .... المهم قتلو نافيgي شوية دراهم و نتكل على الله .... كنت حاكمها مع وحدين خاوتنا حراقة و نقسرو بالون football مع بعض ف الكرطي حتى في يوم من الأيام اتكسرت يدي 😢😢😢 و انا لا ورقة لا هم يحزنون .... طحت ف ستاد و اتكسرت و صحابي عيطو لومبيلونس داوني للمستشفى قالولي لازملك عملية #المسامير يديرولك و لازم تكون عندك #كارت_فيتال قتلهم انا حراق قالولي صح أي وثيقة عندك باسبور و لا عفسة انا ما عندي والو ... المهم الطبيب الجراح قال أنا نتحمل المسؤولية و نديرلو العملية .... الطبيب من اصل قبائلي. ... دارولي العملية في رمضان ( اييييه يا لغربة ) و بقيت يومين ف المستشفى و خرجوني و بعدها قررت الخروج و الذهاب إلى ألمانيا الاتحادية و تفكرت فقط البلاصة #درسدن لي قالي عليها التيارتي ولد بلادي لي رماني على راسي لي كان عايش في لالمان .... 

المهم حكمت #الكار رايح ل برلين و في برلين بدلت و حكمت نتاع #درسدن و وصلت 23:00 إلى محطة درسدن و خرجت من المحطة كاش ما نلقى واحد يحكي انجليزي. .. كانت وحد المرأة حامل مع زوجها حوالي 27 سنة هو و هي .... سألته ب انجليزية لم أكن اتكلم ألمانية هذاك الوقت .... قتلو راني رايح ل #كمنيتس وين نركب ... قالي خلاص القطارات دوك لازم تستنى حتى للصباح بات هنا و الصباح تقدر تروح .... كان البرد ف ليل ..... أيا باي باي. ... الزوجة تاعو ما كانتش بعيدة .... شفتو راح ليها و ارجع قالي ب هذا الكلام (I'm so sorry ) انا اسف جدا زوجتي قاتلي ماشي من الإنسانية نخلوه هنا و هو مكسر من يدو ف ليل و البرد و رواح معاي للدار ترتاح و من بعد تروح .... 

ركبت معه ف السيارة و مشيت للدار عندو 2 بنات وحدة 3 سنين و الأخرى 5 سنين سبحان الله الخالق ..... سأضع صورهم في التعليق ..... 

الصباح قالولي هل أنت مسلم قلت ايه ... راح اشرالي لحم حلال و بعض الأكل من عند الأتراك. .. صدق أو لا تصدق يا أخي المسلم. .......

يتبع ......

الهروب من الجحيم الى المجهول ''الجزء 15''

ايه يا خاوتي دخلت ل مرسيليا انا و سي كمال و حمزة ف ليل و صباح خرجت ندير دورة حتى حسبت رجعوني للبلاد نسخة كوبي كولي لالجيغي أون كولاغ 😂😂 رحت درت دورة ف المرشي حتى سمعت أيا مالبورو بلاد مالبورو بلاد زدت درت حتى سمعت أيا نعناع و لاخر أيا المسمن أيا مطلوع راهو قريب يخلاص 😂😂😂😂 يا ربي هاو انا ضربت خريطة أوروبا باش نلقى المسمن يقارعلي 😂😂😂
بقيت تماك يامات حتى اتصل بيا صاحبي ف سكايب ....
الو واش ا أمير كيراك خويا و وين راك ...
أهلا خويا عيسى كيراك راني في فرنسا.. عيسى البرايجي لي كان معاي ف تركيا و اليونان
يا أمير راني دخلت ل #هنغاريا و كيفاش ندير دوك
شوف خويا عيسى غير ب شوية اسمعني و تبعني مليح و اكتب في ورقة واش نقولك برك ... اعطيتو الطالع و الطريق ... كي توصل ل #نيس nice يرحمها ربي ....
الله يحفظك خويا أمير .... بلا مزية خويا عيسى ....
ماشي يامات بزاف و اتصل بيا و قالي راني ف الحدود نتاع فرنسا ... قتلو ادخل ل نيس و كوv روحك دوك نجيك ....
كان عندي صاحبي هو من واد سلي #شلف كي العادة هههه وسمو هاشمي الله يذكرو بخير راجل و فحل و ولد فاميليا
الهاشمي خويا حاب نقصدك و راني حشمان خويا
أهدر أمير ماشي مشكل لي نقدر عليها راني هنا
كاين واحد صاحبي كان معاي ف يونان و راهو وصل يلا تقدر نروحو نجيبوه من نيس تخاف يحكموه ف #تران
هذي هدرة أمير يالله أصبر نعمر مازوت. ...
كانت عندو megane senic قلعنا و اتجهنا ل نيس و حتى تلاقيتو عند المحطة ... أقسم بالله ما عرفتو شيان بزاف و نقص بزاف تغبن بزاف هو ف الطريق و طاح اونبان لا أكل لا والو. .... أهلا خويا عيسى علا سلامتك
أهلا أمير سمحلي غبنتك. .. خسارة عليك عيسى ركبنا في فلوكة وحدة و كلينا في طبسي واحد المهم نشربو قهوة و نتكلو على ربي ....
رجعنا ل مرسيليا و هو قعد حوالي 3 ايام و راح ل باريس عندو فاميلتو تماك. ...
انا زدت يامات من موراه في مرسيليا و طلعت لباريس و ما نعرفش بولون دنيا أخرى في باريس
وصلت و اتصلت ب عيسى ... الو عيسى راني في باريس و ما فهمتش ترن ...
عيسى : لالا خلاص دوك نجيك و دوك توالف 😂😂😂 طاحلي زايد في فرنسا 😂😂😂😂😂 الله يذكرو بخير و الله غير زعيم عيسى . ( للتذكير عيسى كان في القوات الخاصة تاع بسكرة ) ...
المهم وصل عندي رحت معاه للدار و قتلو يا عيسى انا ما جيتش باش نبقى هنا انا راني مسهل ل ألمانيا راك تعرف ....
قالي يا خو انت تعرف و انتوما التيارتيا تقول كاتبينلكم على لالمان 😂😂 .... المهم تلاقيت واحد ولد بلادي تيارتي في #بارباز وسمو جابوني هو كان في لالمان و خرج منها رجع لفرنسا ...
جابوني خويا راني رايح ل ألمانيا كيفاش ندير و وين نروح فهمني ....
يتبع .......

الهروب من الجحيم الى المجهول ''الجزء 14''

الجزء ال14....
فتحولي الباب تاع السيارة تاع شرطة الحدود فورgونات كبيرة حتى تلاقيت بني عمك متساتفين كل واحد و منين جابوه من نقاط مختلفة و أول واحد حكيت معاه كان عنابي سموه #كحلة الله يذكرو بخير راهو حاليا في مرسيليا كاين داير قالبو بلي رجلو مكسورة 😂😂😂 و آخر من تيزي وزو قالي #يا_عجابا_كيفاش_حتى_شافونا ههههههه و آخرين من مدن مختلفة و كلهم جزائريين حوالي 13 واحد دارو بينا شوية كاش ما يزيدو يلقاو حراقة داخلين على الحدود ....
و بعد ساعتين داونا للكوميساريا في منطقة #ديبريسن و بعدها إلى الكامب و اعطاونا غرف و تيكيات للأكل و يخلصوك هههههه تبقى حاير و يلا راك مريض يداويوك .... جابولنا مترجم للغة الهنغارية هو جزائري عنده حوالي 50 سنة في عمرو من ولاية جيجل مع التحية لسكان جيجل و كان ينصحنا واش نقولو و عطاونا ورقة نمشو بيها صالحة لمدة 6 أشهر ... بقيت 4 أيام في ديبريسن و حملت نفسي و إلى العاصمة #بودابيست و بعدها إلى gyor منطقة حدودية مع دولة النمسا العظمى Autriche و دخلت إلى إلى العاصمة #فينا ليست بعيدة على الحدود الهنغارية و زدت رحت للكامب هههههه كيف كيف نفس العقلية مع هنغاريا غرفة و أكل و تخلص 😂😂😂 حاكمة خخخخخخ تروبوزي و تلاقيت مغاربة و جزائريين و تلاقيت صحفي جزائري جا ب الفيزا و طلب لجوء سياسي بات ليلة معنا و الصباح جاو داوه مش عارف وين .... خرجت من فينا إلى الحدود الإيطالية و دخلت إلى مدينة #برينيرو و بعدها بونزالو و إلى #تورينو و إلى مدينة #فانتيميليا الحدودية مع مدينة #نيس الفرنسية
اركبت ف القطار و خايف تلاقيت شيبانية قعدت نداسر فيها 😂😂😂 نهدر فيها ذراع علاخاطر ف الحدود الفرنسية يطلع البوليس و يطلب الأوراق ...طلعو ضربو طلة خفيفة و نزلو و دخلت إلى مدينة نيس الفرنسية .... أنزلت و روحت لوحد الطاكسيفون عندي صاحبي من شلف يعيش في مرسيليا اتصلت بيه ....
ألو أهلا كمال ....
كمال : الو شكون معاي
أمير معاك هههههه
كمال : مكانش منها راك هنا أ حواجة ههههه
ايه هذا وين دخلت و راني في نيس واش ندير ....
كمال : استناني دوك نجي نريكيبيري خويا روح عند la gare de Nice دوك نجي حوالي ساعتين نكون عندك نيس بعيدة وحد 200 كلم على مارساي
اوكي كمال راني نستنى خويا ...
فات ساعتين و ما جاش رجعت الو ا كمال وين راك
كمال : أصبر ا حواجة راني قريب أخ هههههه
المهم شوية و حبست Audi كحلة حداي جا هو و واحد أعز صديق وسمو #حمزة.... تقهوينا و إلى مرسيليا الله يكثر خيرهم و تحية لناس لصنام بالمناسبة ....
دخلنا حوالي 3 تاع الصباح ل مرسيليا كانت فارغة و ف الدخلة و سط المدينة لا أحد غير وحدة عربية تدور مع واحد كحلوش 😂😂😂😂.....
رحنا للدار و الصباح خرجنا حتى حسبت روحي رجعوني للبلاد اكسبيرسي 😂😂😂😂😂 مرسيليا نسخة للجزائر كوبي كولي
يتبع ....

الهروب من الجحيم الى المجهول ''الجزء 13''

الجزء 13....... 
قعدت 3 أيام في هذيك الدار و قالي موح أمير تساعفني غير كمل الطريق انا ما رانيش رايح انا حاب نستنى حتى ندخل على كرواتيا و انت علابالي راك باغي تدخل على #هنغاريا #المجر قتلو ايه .... قالي روح ل #سيبوتيسا و من تما ادخل راهي الطريق مفتوحة و غير تفوت الحدود تلقى الشرطة الهنغارية سلم نفسك ليهم و هوما يدوك. ... كي توصل إلى #سيبوتيسا أدي طاكسي للحدود و قطع على جهة اليسار تلقى شباك اطلع و أقفز و روح نيشان حتى تعبر الحدود و بالاك يمسكوك الشرطة الصربية راح ترجع حتى نقطة الصفر و يرجعوك حتى إلى #لويان مقدونيا .... المهم قعدنا مع بعض و الصبح اتكلت على ربي و مشيت لهذيك المنطقة ..... ديت طاكسي ب 20 أورو حتى الحدود و قطعت الطريق و قفزت فوق الشباك ماشي طويل حوالي متر و نصف و مشيت ف الظلمة ضواحي منتصف الليل و كاين غابة ماشي كثيفة خفيفة و مشيت و دخلت الحدود و تعمقت في #هنغاريا 😍😍 و كاين هذاك الوقت بزاف جزائريين يدخلو و لكن من نقاط مختلفة و كاين سيارات شرطة كبيرة فورgونات يدورو و يجمعو فيهم واحد واحد و يشوفوك ب لاجيمال الليلي أنفراروج انا رجعت نبحث على البوليس 😂😂😂😂
حتى والله بلا ما نعبى حتى حبس عندي والله ما تسمع الموتار ههههه Hi you have got passport هاي عندك باسبور هههههه قتلو أهلا بيك ههههههه
أهلا وسهلا بك لقد دخلت الاتحاد الأوروبي 😍😍😍😍😍
ربي كبييييييييييييييييييييييييييييييييييييير
يتبع ....